قبل الزواج ، تهفوا البنات للقب "مدام" وممكن تعمل عجين الفلاحة او ترقص آة يا لموني..بس تاخد اللقب، من موقعي هذا وبما ان...
قبل الزواج ، تهفوا البنات للقب "مدام" وممكن تعمل عجين الفلاحة او ترقص آة يا لموني..بس تاخد اللقب، من موقعي هذا وبما اني زوجة وأم عاملة أحب أقول لكل بنت إوعي تفتكري إن الجواز حياة وردية، وأوض بنفسجية...أبسلوتلي نيفر إيفر، الجواز
• يعني رجل ( بكسر الراء) في المطبخ ورجل( بكسر الراء تاني) مع ابنك تذاكري له.
• يعني مضطرة تقومي بواجبات اجتماعية لا ينوب عنك غيرك.
• يعني تأكلي، تطبخي، تغيري، تنضفي، تذاكري، تربي، تنشري، تكوي، تغسلي وتنامي آخر الليل زي أهل الكهف كده.
• يعني كعاب رجلك تنأح عليك ومتلاقيش وقت تحطيهم في شوية ملح ومية سخنين.
• يعني لو ركبت عداد تاكسي في رجلك هيجيب يجي 4 كيلو يوميا من لفك في البيت وتقضية مصالحه.
• بعني تبقي أول واحدة تصحي وآخر واحدة تنام في البيت.
• يعني متلاقيش وقت لنفسك نوهائي فتعلو عندك قيم التضحية والتفاني لغيرك وأما عن شخصك الكريم" فيولع بجاز"
• يعني تحتاجي تسرقي تغفيلة في يومك المزدحم وتصحي مسروعة على: فلان ضربني، عاوزة آكل.
• يعني ماتعرفيش تتصلي بحد ولا حد يتصل بيك إلا إذا كان كل من في البيت نايم.
• يعني تستخسري تنامي معاهم عشان تشربي كباية شاي لوحدك وتتفرجي على ميلودي دراما.
• يعني تنسي الكوافير، وقلم الروج.
• م الاخر انسي انك بنو آدمه.
لا انكر إن كل مرحلة ولها لذة وإن مسؤلياتنا تكبر معنا لكني أيضا لا انكر رغتي الشديدة في ان أستمع للقب " آنسة" أي والله بشتاق لها:
يمكن لانها بتشعرني أصغر؟
يمكن لانها تعيد شحني بطاقة ايجابية؟
يمكن لانها تشعرني بإن لسة فيا رمق!!
يمكن لأنها بتدفعني للتبسم؟
من أيام كنت في محل كبير لبيع الأدوات المنزلية وسألت على" طاسة كبيرة" الراجل إلهي يستره دنيا وآخره قالي:
- على اليمين يا آنسة
- ها؟
- بقول لحضرتك على اليمين جنب فناجين القهوة.
- مممم.. طيب شكر
(بصراحة أنا سمعتها من أول مرة .. بس حبيت أسمعها تاني.. رحت وجبت الطاسة ورجعت أحاسب وكلي شوق أسمعها تاني.)
- بكام دي؟
- إستني كده( خد الطاسة وقلبها ملأش عليها سعر.. نده على واحد وقاله )
- يا حمادة شوف الطاسة دي بكام للانسة.
( يالهوي ياني ، اشجيني، قولها تاني، اية النغم دة، يارب يغلط ويعيدها تاني.. راح حمادة ورجع وقال السعر وقالي )
- اتفضلي يا مدام
( يلعن ابو شكلك.. عكرت مزاجي يا عديم النظر... كان هاين عليا ألبس الطاسة في دماغة أنقذته مني زبونة تانية .. رجع ابو وش سمح يقول)
- هتاخديها يا ...آنسة؟
( اية اللحن ده.. طب وديني ما مصلحالك المعلومة..)
- طبعا هاخدها( في سري من وشك السمح ده وتقديرك العالي لازم بل فرض عين آخدها)
واشتريتها بالفعل لكن الغريب فعلا: اني خرجت وانا في قمة انشكاحي، والاغرب اني محاولتش اصحح المعلومة مطلقا والأطرف ... إني لبست الطاسة)
المصدر: سمر الهوانم
ليست هناك تعليقات:
إرسال تعليق