اومال لو مكنش بينا صلة رحم كان عمل ايه

انا اسمى ,,,,, عندى 20 سنة من صغرى كنت متربية فى بيت جدتى وكنت عايشة معاها ولما اتوفت وانا ف ابتدائى روحت عيشت مع بابا وماما وسيبت بيت الع...

انا اسمى ,,,,, عندى 20 سنة من صغرى كنت متربية فى بيت جدتى وكنت عايشة معاها ولما اتوفت وانا ف ابتدائى روحت عيشت مع بابا وماما وسيبت بيت العيلة وبعدين وانا فى 2 اعدادى رجعنا انا وبابا وماما واخواتى فى شقة تيتاا وعيشنا فيها وايامهاا انا كنت بدأت اكبر بقى وافهم واعقل وحبيت ابن خاالى هو كان اكبر منى ايامها كان عنده 19 سنة وانا حبيته جداا بس مكنتش بقوله بس كنت مجنونة بيه وايامهاا كانت مراهقة وكدة وهو كان فى العمارة اللى جمبنا كنت اول ما اسمع صوته اجرى على البلكونة وابص عليه كنت اسهر للصبح عشان اشوفه وهو راااجع من برة كنت بحس انه بيبصلى بس كنت بقول ده اكيد عشان بحبه بحس بكدة وبعدين حصلت مشاكل بسببى فى الشارع كان فى شباب بيغلسو عليا وانا رايحة دروسى ومدرستى وحصلت خناقة كبيرة وبابا خلانا نمشى من المنطقة وبعدت خالص ومكنتش بشوفه غير ف المناسبات ومع ذلك مكنتش بفكر غير فيه ودخلت ثانوى وجيت فى 2 ثانوى كان فى حفلة فى المدرسة وانا كنت من منظمين الحفلة وكنا عاوزين دى جى اتصلت بيه وجه وكدة وكان بقالى كتير مشفتووش بس من ساعتها وبدأنا اتكلم انا وهو بس من ناحيته مكنش بيقولى اى حاجة وانا كنت ببقى فرحانة اوووى انى بكلمه وبعدين مرة المديرة قالتلى عاوزة الكارت بتاعه واتصلت بيه عشان اخده وقالى هاجيلك بعد المدرسة وجالى ووصلنى لحد البيت واحنا ماشيين قعد يقررنى فى الكلام وقعد يقولى انا حاسس ان انتى فى حاجة لو فى حاجة قولى وبصراحة وكدة وانا قولتله اه فى وكدة وقالى مقولتليش ليه من زمان قولتله عشان مينفعش ابدأ انا كان لازم تحس قالى طيب انا عندى مشاكل الايام دى هحلها وهابقى معاكى على طول وانا طبعا بقيت طايرة من الفرحة وبعدين بقيت اتصل بيه بقيت احس انه بيرد عليا بقرف وبيكلمنى بتكبر حسيت انى ضيعت كرامتى وندمت انى عملت كدة ف مرة قولت اتصل اطمن عليه لقيته بيقولى مش هينفع نقرب من بعض اصلى انا كنت مرتبط ب واحدة ومعشمها ومينفعش يعنى انتى جيتى متأخر انتى اللى غلطانة مقولتليش من الاول جرحنى اووى طيب ليه كان عاوز يعرف منى بحبه ولا لا ما كان سابنى باللى انا فيه وبدأت مكلموش خالص ولما اشوفه بتجاهله ازيك الله يسلمك بس وبعدين سمعت انه خطب وبعديها ب كام شهر انا جالى عريس ووافقت عليه واتخطبت انا كماان ولقيته بيكلمنى وباركلى وزعلان انى وافقت وانتى شوفتيه فين طيب وافقتى ازاى انتى مش بتحبينى استغربتله قولتله ما انت خاطب وانا مش هستنااك يعنى لحد ماتتكرم وتكلمنى وانت اصلا زى اخويا وبس وقفلت معاه الكلام لانى مخطوبة ومينفعش عيب فى حق خطيبى لازم احترمه وكدة وبعدين محصلش نصيب بينى وبين خطيبى ومرة كان بيكلمنى على النت وشافنى عاملة انى بقيت سينجل قالى خير قولتله محصلش نصيب بدأ يرجع يكلمنى بحنية تانى ويحسسنى انه عاوز يكمل معايا حياته بس انا كنت ببقى دبش معاه فى الكلام وكان بيزعل كان بيطلب كل شوية يقابلنى وانا كنت برفض عشان مكنش ينفع اخرج معاه حتى لو قريبى الناس متعرفش انه قريبى وهو كان بيزعل كان بيقولى دايما بحس معاكى احاسيس جميلة وفجأه ف مرة قالى انه بيحبنى اوى قولتله ازاى انت خاطب قالى مانا بحب خطيبتى بحبكو انتو الاتنين قولتله ازاى يعنى قالى قلبى كبير حسيت انه بيلعب بيا وانى مش فارقة معاه بدأت اكرهه واخد منه موقف وبدأت ابعد واحدة واحدة وبقى هو اللى بيقرب ويكلمنى ويسئل عنى لحد ما فى مرة قالى انه عاوز يتجوزنى بس بعد لما يتجوز خطيبته دى ابقى الزوجة التانية يعنى ف انا رفضت وقولتله انت بتخون خطيبتك وبتحسسنى بالذنب من ناحيتها متتكلمش معايا كدة انت مش اكتر من اخويا الكبير ومينفعش يبقى اكتر من كدة ومن ساعتها وانا مش بكلمه ولا حتى بسئل عليه ولا عاوزة 

اانا مدايقة اووى منه وكل ما اشوفه ف مكان بدير وشى وكل مانبقى متجمعين كلنا ببقى متجنبااه وكل العيلة لاحظت ده وبيعتبونى انا هما ميعرفوش اى حاجة من دى بس شايفين انى ناشفة اووى معااه وانى بكلمه بقرف وبغرور ومدايقين منى خصوصا باباه ومامته وبيدايقو منى لما بيشوفونى بكسفه ع طول .. انا مش عاوزة حد من العيلة يكرهنى ويحس انى مغرورة بس انا مينفعش اتعامل معاه غير كدة 

ومينفعش احكى لحد على حاجة عشان ميطلعش شكله زبالة قدامهم

انا مش عارفة اعمل اييه بجد بقيت بتجنب انى اروح اليوم اللى بنتلم فيه كلناا بسببه 

اسفة طولت عليكو بس بليز ساعدونى اعمل ايه

لارسال المشاكل ابعت رساله على البيدج هنـــا