تعالى ياستى اما اقولك على خمس حاجات انتى مش فهماها فى شخصيه الراجل

 شخصيه الراجل دى حاجه غامضه بمعنى ان فى حجات كتير انتى ممكن متفهميهاش من شخصيه الراجل مش لانك غبيه ولا حاجه لا سمح الله لا طبعا بس دا لان ر...

 شخصيه الراجل دى حاجه غامضه بمعنى ان فى حجات كتير انتى ممكن متفهميهاش من شخصيه الراجل مش لانك غبيه ولا حاجه لا سمح الله لا طبعا بس دا لان ربنا سبحانه وتعالى خلقنا كدا مختلفين عن بعض وكل حد فينا فيه حاجات خاصه بيه هو محدش غيره هيفهمها وزى ما فى حاجات فى شخصيه الراجل الست متقدرش تفهمها صح فى حاجات كتير برضو فى شخصيه الست بتكون غامضه على الراجل ومبيقدرش يفهمها بس مش دا موضوعنا دلوقتى احنا دلوقتى هنفهم مجموعه من الحاجات فى شخصيه الراجل انتى مش فهماها يلا تعالى معايا ياستى اما نشوف ايه هى اول حاجه

اول لغز:

الصمت الصمت دا بيجنن الست اما تلاقى الراجل ساكت ودا لانها مبتبقاش عارفه هو ساكت ليه طب هو زعلان ولا مضايق ولا تعبان ولا ايه ولا ايه ولا ايه وخصوصا ان الست اما بتسكت فا دا لانها بتكون اما حزينه او غضبانه او مكتئبه 

اما الراجل بطبيعته بيسكت اما مابيكونش فى حاجه يقولها ومش معنى انه ساكت يعنى فى حاجه مزعلاه او مضيقاه فا بلاش انتى باه تبقى زنانه وعماله كل شويه مالك فى ايه طب انت زعلان ليه طب حصل ايه طب كلمنى طب معرفش ايه لان انتى كدا هتخنقيه وهتخليه يطفش منك ويهج فا لازم تخلى بالك لما تلاقيه ساكت متبقيش لحوحه ولو عايزاه يتكلم معاكى ممكن بكل بساطه تفتحى اى موضوع تكونى عارفه انه بيحب يتكلم فيه وانتى هتلاقيه واحده واحده بدا يدخل معاكى فى الكلام ويخرج من حاله الصمت

تانى لغز:

اما تيجى تطلبى منه اى حاجه وتبصى تلاقيه فجاه كدا راح هابب فيكى زى وبور الجاز مع ان ممكن جدا يكون الطلب الى انتى طلبتيه دا طلب بسيط جدا مش محتاج كل الى حصل دا وطبعا انتى بتزعلى ويصعب عليكى نفسك وتحسى ان انتى بتدى كل حاجه واما تيجى تطلبى طلب بسيط دا بيكون رد الفعل 

طب براحه كدا ومتزعليش وتعالى اقولك دا بيحصل ليه شوفى ياستى ربنا سبحانه وتعالى خلق الست عندها قدره غريبه فى ان هى تركز فى كذا حاجه مع بعض يعنى تقدر تكون بتتفرج على التى فى وبتكلم فى التليفون وبتذاكر للعيال وبتقشر البطاطس كمان يعنى تقدر تعمل كذا حاجه فى وقت واحد 

والعكس باه مع الراجل الراجل صعب جدا انه يركز فى حاجتين فى وقت واحد عشان كدا اما يكون هو بيعمل حاجه وتيجى انتى بكل حسن نيه وتطلبى منه انه يعملك اى حاجه او تطلبى اى طلب منه تلاقيه يروح متعصب فا انتى لازم باه ياستى تنقى الوقت المناسب الى يكون هو فيه مش مركز فى حاجه وتطلبى الى انتى عايزاه

اللغز التالت:

الست المسكينه بتكون متخيله ان الراجل دا هيبقى فارس احلامها الى هيحنوا عليها وهيقدر زعلها وهيهتم بيها وباى حاجه تزعلها وعشان كدا يعينى اما بتيجى تشتكى من حاجه ليه وتلاقى رد فعله ان دى حاجه بسيطه ومش مستهله الزعل دا كله طبعا بتحس بالصدمه وان هو مش مقدرها ولا مقدر زعلها ولا حاسس بيها ولا ولا ولا ولا 

طيب تفتكرى ايه السبب ياستى انا اقولك ايه السبب السبب ان الراجل بيتخيل ان الست محتاجه نفس الى هو محتاجه فا بيقدملها الى هو فاكر انها محتجاه يعنى االاجابه الى بيقولها ان دا موضوع تافه ومش محتاج منها الزعل دا كله دى بتكون اجابه منطقيه جدا بالنسباله ومبيفكرش فيها زى ما الست بتفكر فيها هو بيتخيل انه كدا بيريحها

اللغز الرابع:

يلا ننزل نروح نشترى حاجات طبعا اما اى ست بتطلب كدا من الراجل لازم الخروجه تقلب بنكد لان الراجل بيكون عصبى ومتضايق وعايز يمشى والست طبعا بتكون عايزا تنقى براحتها وتاخد وقتها ومبتكونش فاهمه هو متعصب ليه 

انا باه اقولك هو متعصب ليه الراجل بطبعه بيحب يركز واى دوشه او زحمه بتاثر عليه وكمان كتر البضايع وكتر البايعين بيصيبه بالتوتر ودا الى بيخليه يكون عصبى وعايز يمشى بسرعه

اللغز الخامس:

التغير الراجل اما بيدى اى ملحوظه للست الست على طول بتحاول ترضيه لكن طبعا اما بيكون العكس يعنى الست هى تطلب التغير من الراجل بتلاقى رفض وعصبيه ونرفزه ودا ليه باه 

اقولك ياستى الراجل اما بيحس ان الست مش مقتنعه بيه وعايزا تغيره فا العند باه بيشتغل فى دماغه وبيرفض اى تغير حتى لو كان صح لانه بيعتبر تحدى ليه ولشخصيته وعشان كدا بيرفض التغير لكن هو لو حس انك انتى مقتنعه بيه وبشخصيته وبعد كدا قدرتى انك تختارى الاسلوب الصح عشان تخليه يغير حاجه فى شخصيته فا انت سعتها هتقدرى تخليه يتغير وبمزاجه كمان