شويه كلام كدا ميحبش انه يسمعه منك ركزى معايا شويه ياحجه

 بصى ياست الكوتكوته فى شويه كلام كدا انا هقولك عليه طبعا اكيد يعنى مش هسيبك كدا الكلام دا باه ياستى هو الى مقصود بيه الراجل طبعا ميحبش ابدا...

 بصى ياست الكوتكوته فى شويه كلام كدا انا هقولك عليه طبعا اكيد يعنى مش هسيبك كدا الكلام دا باه ياستى هو الى مقصود بيه الراجل طبعا ميحبش ابدا انه يسمعه منك والله باه لو عايزه تطفشيه اشطا قوليه براحتك لكن لو فارق معاكى وعايزاه يبقى عليكى بالى انا هقولهولك دا افهميه كويس بصى ياستى اول حاجه

اهلى واهلك:

المفروض دا المفروض يعنى اما ربنا بيكرمك وتتخطبى او يبقى فى اى ارتباط رسمى بينك وبينه المفروض اخدالى بالك انتى المفروض ان دا معناه انكوا كلوكوا كدا على بعضكوا بقيتوا عيله واحده يعنى معدش باه فى حاجه اسمها امك وامى اهلك واهلى لان دا بيخليه يحس بالتفرقه العنصريه وان فيه فروق والحوارات دى فا الاحسن انك تلغى الحوار دا وطبعا طبعا طبعا تنسى تماما حوار المقارنه سواء بالسلب او بالايجاب مينفعش تقارنى وتقولى اصل اهلى بيعملوا كذا واهلك بيعملوا كذا 

تانى حاجه كلمه خليك راجل:

طبعا اى حد عاقل فى الدنيا هيقولك ان الكلمه دى مينفعش ابدا انها تتقال مهما كان الموقف ومهما كان الى حصل انتى لو فى حاجه مضايقاكى فى تصرفاته وشايفه انه فى التصرفات دى هو مش راجل كفايه خلى ياحجه الاحساس دا لنفسك مش لازم تصرحى بيه واعرفى ان عمر الكلمه دى ما هتصلح اى حاجه بالعكس انتى لو قولتيها هتبوظى كل حاجه وهتخسريه لان انتى كدا وصلتيله احساس انه مش مالى عينك وانك بتشككى فى رجولته ودى منطقه حساسه جدا عند الراجل لكن انتىلو فى اى حاجه مضايقاكى يبقى الاسلوب الى هينفع هو اسلوب الكلام براحه وبالقناع هو دا الى هيجيب نتيجه وممكن يغير فيه كتير لكن النقد السلبى دا عمره مايجيب نتيجه ابدا كويسه

تالت حاجه لو كان معايا فلوس اكتر كنت وكنت وكنت:

بصى باه ياستى طبعا كلنا عارفين الحاله الاقتصاديه ال............ الى البلد بتمر بيها واى حد بيتجوز اصلا فى الايام دى يبقى بطل لان الجواز دلوقتى بقى صعب جدا وعايز امكانيات مهوله مش اى حد يقدر عليها فا انتى باه تحمدى ربنا على فضله ولازم تعرفى امكانيات الانسان الى معاكى وتتعاملى على اساس امكانياته دى ومش لازم كل شويه تفكريه بحالته الماديه وانك نفسك ونفسك ونفسك ونفسك وهو مش قادر يحققلك دا انتى كدا هتحسسيه بعجزه وانه مش قادر يقدملك اى حاجه كويسه ودا طبعا هيخليكى تخسريه واحنا اصلا ماصدقنه نخلص منك 

رابع حاجه لو كنتى مرتبطه قبل كدا:

بصى ياستى لو مكنش هو اول راجل فى حياتك سواء كنتى مرتبطه او مخطوبه او متجوزه قبل كدا لازم تحاولى تنسى الحوار دا مش بمعنى تنسيه لكن اقصد انك مينفعش تتكلمى فيه لان الراجل مهما حاول انه يبينلك ان الموضوع دا مش فارق معاه فا دا غير صحيح الموضوع دا بيفرق جدا مع اى راجل ومبيحبش يفضل يسمع عن الشخص الى كان موجود قبل كدا لا بالخير ولا بالشر فا انتى لازم تحافظى على مشاعره ومتفتحيش الموضوع دا ابدا مراعاه لمشاعره

خامس حاجه الكلام المتغطى :

اللف والدوران ورمى الكلام والكلام المتغطى طبعا مش بس الراجل هو الى بيضايق من الحوار دا لا كل الناس مبتحبش كدا عشان كدا لو فى حاجه مضيقاكى قوليها بشكل واضح وصريح من غير لف ولا دوران بس طبعا لازم يكون بالاسلوب المناسب

سادس حاجه مفيش حاجه انا كويسه:

الجمله دى حلوه اوى وتمام لو انتى فعلا كنتى كويسه ومفيكيش حاجه لكن لو انتى مش تمام وبتبصى البصات اياها الى هتحرق الى قدامك دى او لو كنتى بتصرفى بغضب ونرفزه وتقولى الكلام دا فدا هو الغلط ليه باه اقولك ياستى ليه لانه لو قالك خلاص اوك هيتحرق دمك اكتر وهتتنرفزى اكتر والموضوع هيقلب بخناق فا عشان كدا لو فى حاجه مضيقاكى ومزعلاكى قولى عليها على طول عشان تحلوها ما بينكوا وميبقاش فى اى حاجه جواكى مزعلاكى

سابع حاجه اختك دى انا مبحبهاش او مامتك دى انا مبحبهاش:

بصى ياست الكوتكوته اخته او مامته او اى حد من عيلته مبتحبيهوش براحتك دى حريه شخصيه بس لازم تخلى احساسك لنفسك هو ماله هو تحبيهم او متحبيهمش هيعملك ايه يعنى مش هيغيرهم اكيد يعنى فا منعا للمشاكل والدوشه انتى متكلميش فى حاجه زى دى وخليها جواكى لانك مش هتستفيدى حاجه لو صرحتى بيها بالعكس

تامن حاجه مش فارق معايا او ميهمنيش:

الجمله دى جمله بتعصب الى قدامك مهما كان هو مين فا بلاش منها

تاسع حاجه اسئله مش عايزا تسمعى اجابتها :

لو فى حاجه انتى مش مستعده انك تسمعى اجابتها الصريحه يبقى متقوليهاش بمعنى لو انتى بتسالى على حاجه ومنتظره ان الى يجاوبك يجاملك يبقى متساليش احسن لانه ممكن يقولك بصراحه وساعتها هتزعلى

عاشر حاجه المقارنه:

متحطيش نفسك مع اى حد او اى حاجه فى مقارنه مهما كان السبب لان انتى ليكى مكانه مش لاى حد مينفعش انك تسيبيها وتنزلى منها متقارنيش نفسك لا بشغله ولا بحد من صحابه ولا بهوايه بيعملها ولا باى حاجه خالص

وبكدا ياستى اكون انا خلصت ويارب تكونى استفدتى من كل الكلام دا