شويه نصايح ليكى وانتى بتروقى البيت متقوليش لجارتك عليها لومبتحبيهاش يعنى

 شوفى باه ياستى هقولك دلوقتى على خمناشر نصيحه ليكى وانتى بتروقى البيت هتخلى حوار الترويق دا شئ ممتع وجذاب وحاجه هتبقى بتحبى تعمليها من كل ق...

 شوفى باه ياستى هقولك دلوقتى على خمناشر نصيحه ليكى وانتى بتروقى البيت هتخلى حوار الترويق دا شئ ممتع وجذاب وحاجه هتبقى بتحبى تعمليها من كل قلبك وطبعا انا بسرح بيكى مش لدرجادى يعنى بس انا بقولك كدا عشان تركزى معايا النصايح دى هتخلى التنضيف مش مشكله كبيره ومعقده لا هتخليه بسيط وسهل

اول نصيحه :

وانتى مشمره كدا واستعنتى بالله وكتبتى وصيتك وقررتى انك تنضفى البيت بدل باه ياستى ما تفضلى راحه جايه راحه جايه راحه جايه وتروشينا معاكى عشان كل شويه تجيبى فوطه او منديل تلمعى هنا ولا هنا ولاهنا لا انتى هاتى شماعه قديمه عندك واخده بالك قديمه يعنى اهو بنوفرلك وقت ومجهود وفلوس كمان اى خودعه واعملى الشماعه دى وكانها عوليقه للفوط وخليها معاكى

تانى نصيحه:

طبعا طبعا طبعا كلنا بنعانى من المواعين وبنتمنى من ربنا انها تختفى من على وجه الكره الارضيه من كتر ماهى زهقتنا وتعبتنا فى تنضيفها ومفيش فايده والواحد يقعد يدعك يدعك يدعك لما ايده تتهرى وهى برضو مصممه على موقفها ورافضه انها تنضف احنا باه نبقى نصحين ونعمل ايه نجيب ملاحه ماشى ياستى ونحط فيها المنظف الى بتستعمليه باه مش هتفرق هو ايه وتروحى ياستى حاطه معاه شويه ملح ايون ملح بتاع الاكل دون وبكدا ياستى هتبقى بروبروء ومتعقمه كمان

تالت نصيحه:

نيجى باه للسجاد وبقع السجاد وتعب القلب الى الواحد بيشوفه فى السجاد الى هو طبعا عذاب الدنيا والاخره وخصوصا لو فى كتاكيت صغيره كل تلت ثوانى توقع حاجه على السجاد وتبقعه وطبعا بيطلع عينك فى تنضيف البقع دى طب تعالى باه ياستى نصيحه اهى مش خساره فيكى عارفه الفرشه بتاعت الهدوم دى اكيد طبعا عارفاها انتى باه ياستى تجيبى الفرشه دى وتحطى عليها شويه صابون سايل من الى بتستخدميه فى تنضيف السجاد وتستعمليها عادى فى اى وقت هتديكى نتيجه احسن واسرع واسهل كمان

رابع نصيحه:

الحيطان حدث ولا حرج طبعا الحيطان دى اكتر حاجه بتلم التراب وخصوصا التراب الناعم الى بيتراكم فوق بعضه واذ فجاه كدا تبصى تلاقى الحيطه بدل ما كان لونها بينك بقت كحلى ازاى الله اعلم ودا طبعا بيكون بسبب التراب وبسبب انها مبتتنضفش غير كل عيد وعليكى خير وتبصى تلاقى نفسك مضطره انا تدهنى البيت تانى من اول وجديد كل فتره وتبقى ضاعت فلوسك ياصابر والله يعوض عليك ياعم الحج طب وليه ما انتى ممكن تتجنبى كل الحوارات دى بحاجه بسيطه جدا انك تخصصى للحيطه عشر دقايق كل اسبوع ايون عشر دقايق بس مش اكتر هنعمل ايه باه ياستى هتجيبى فوطه ناشفه خالص وياريت تكون قطن وناعمه وتجيبى الزعافه وتحطى الفوطه عليها وتمرى بيها كدا على الحيطان واحده واحده هتلاقيها بقت زى الفل ومش بس كدا دى كمان هترحمك من حساسيه الربيع انتى والكتاكيت الصغيره

خامس نصيحه:

علب التوابك الواحد اول ما بيجيبها بتبقى بنت ناس ومحترمه وشيك كدا وباين عليها القيمه هما بس شهرين بالكتير وتحسى انك جيباهم من سوق الجمعه ودا طبعا بيكون ليه سالتينى ليه اقولك ياستى ليه انتى وانتى بتشتغلى فى المطبخ واستغفر الله العظيم يارب بتطبخى يعنى ايدك بتتبل كتير وطبعا مش كل شويه هتقعدى تنشفى فيها كدا صوابعك تتبرى انتى بتروحى ماسكه العلب على طول ودا بيخليها تتبهدل بسهوله طب والحل اقولك ياستى الحل الحل انك تجيبى بخاخه وتحطى فيها شويهخل مخفف بالمياه وفوطه قطن صغيره اوى وتستعمليهم بشكل مستمر فى تنضيف العلب واهى تبقى فرصه انك تشوفى الحجات الى جواه العلب احسن تكون باظت من كتر الركنه

سادس نصيحه:

الكارثه المستخبيه باه الى محدش عارف بيها غيرك الدراج ماساه كل بيت اهو هو دا الى بيتقال عليه من بره هالله هالله ومن جوه اعه اعه طبعا بعد فتره بتبصى تلاقى الدرج دا عامل زى متاهاه ومليان حاجات انتى اصلا متعرفيش الحاجات دى تطلع ايه وجت منين وايه لزمتها فى الحياه اصلا طب وبعدين والحل اقولك ياستى الحل مره واحده كل شهر تجيبى الدراج دى وتفضيها خالص وتمسكى الكوارث الى جوه دى وتصنفيها حاجه حاجه وتحطيها فى كياس وتعنيها بكياسها كدا هتلاقى الدرج بقى منظم وابن حلال وطيب

سابع نصيحه:

مقابض دواليب المطبخ وطبعا حالها زى حال علب التوابل بعد فتره بتبصى تلاقيها بقت شبه اطفال الشوارع يبقى ايه الحل باه الحل ياستى انك كل 3 شهور مثلا تروحى جايه فكاها وغسلاها وملمعاها ومش بس كدا لا تجيبى كمان الاماكن الى حوليها وتنضفيها بمحلول اذابه الدهون وتقومى مركباها تانى وبس خلاص سهله خالص

تامن نصيحه:

الميكروويف طبعا دا تنضيفه بيبقى شئ غلس ورخم دا للى عندها الى معندهاش متحقدش بكره ربنا يكرمها بواحد الى عندها باه ياستى هقولك حاجه بسيطه خالص عشان تنضفيه بسهوله هاتى طبق او صنيه او حله او اى حاجه تحطى فيها ميه ومع الميه اعصرى لمونتين حلوين كدا وحطيهم يسخنوا فى الميكروويف لمده 5 دقايق وبعدين هاتى فوطه ونضفى ياستى الميكرو من جوه بيها هتلاقى التنضيف سهل جدا ودا بسبب البخار والرذاذ الى طلع من الميه وهى بتسخن وابقى ادعيلى

تاسع نصيحه:

بالنسبه باه لغلايه المياه الجماعه مدمنى الشاى والنسكافيه باه والحوارات دى محدش يقول باه ودى كمان تتنضف ليه دى بيتحط فيها مايه بس المايه اصلا نفسها عايزا تتنضف المهم عشان غلايتك تبقى على طول نضيفه وصحيح هنعمل ايه باه من وقت لتانى كدا زى الشاطره هتغلى فيها شويه مايه محطوط عليهم شويه خل على شويه بيكمبودر وتسبيهم فيها قد نصايه كدا عشان يخلصوكى من اى حاجه مش تمام وبعد كدا تقدرى تغلى فيها مايه بس كذا مره عشان تطلعى ريحه الخل والبيكمبودر

عاشر نصيحه:

الزجاج والمرايات عشان تخليهم فله كدا زى بتوع الاعلانات الى معقدينا كلنا دول هاتى شويه مايه مع شويه خل ولمعى بفوطه قطن مره بالطول ومره بالعرض وغيظى بتوع الاعلانات

النصيحه 11:

طبعا احنا البنات شيك وبنحب نطقم الطقم مع الشنطه والشوز وخلافه فا تبصى تلاقى الدولاب مليان شنط وعاملين ازمه طيب نعمل ايه اقولك ياستى نعمل ايه هاتى حزام قديم مستغنيه عنه وحطى فى كل فتحه منه شماعه وفى كل شماعه علقى شنطه او اتنين وحطيهم ورا الباب ولا حد هياخد باله وتوفرى مكان فى الدولاب

النصيحه 12:

فى ناس بتحب تغسل الهدوم الشيتوى الصوف التقيله على ايديها الناس دى باه تاخد منى النصيحه دى وتتوكل على الله وانتى بتغسلى كدا حطى مع المايه شويه شامبو من بتاع شعرك هتتفاجئى بالريحه والنعومه

النصيحه 13:

كتير مننا بليحب يجيب كميات من الصابون ويعينها ويستخدمها براحته تمام اما تعملى كدا باه متحطيش الصابون فى دولاب المطبخ او اى مكان تانى لا حطيها فى دولاب الهدوم هتخلى ريحه هدومك جميله ومنعشه

النصيحه 14:

اما بتيجى تخزنى الهدوم الشتوى ممكن تحطيها فى مكان مقفول مبيتفتحش كتير ودا ممكن يخلى الهدوم تاكلها العته زى مابيقولوا ودا نتيجه لزياده نسبه الرطوبه طيب الحل ايه باه ياستى الحل هاتى شبكه زى بتاعت الليمون كدا وحطى فيها طباشير وعلقيها مع الهدوم وادعيلى

النصيحه 15:

اخر نصيحه ليكى سله الزباله اوقات كتير بيبقى ليها ريحه وحشه اوى طيب نتخلص منها ازاى بسيطه بعد ما تغسلى السله هاتى شويه تلج مجروش وحطيه فيها مع شويه صابون سايل وسيبيها لحد ما التلج يسيح وروجيها كويس وبعدين اغسليها هتلاقى ريحتها فله

كدا النصايح خلصت يارب تكونوا استفدتوا منها واى خدعه